KHLIEHRIAT:
Ki ar tylli ki Public Hearing lane ka jingialang ban pynsngew paidbah halor ka jingpan bor ki ar ngut ki hehspah na East Jaintia Hills na ka bynta ban ioh tih dewiong katkum ka juk thymmai lane ka Scientific Method ka long kaba jop khlem don kano kano ka jingpyrshah na ka jiang ki paidbah.
Ka public hearing kaba la pynlong ha Byndihati ha ka 22 tarik August 2024 na ka bynta ka ‘Dapmain Coal Block’ – U Dapmain uba dei u khun u ma Thomas Nongtdu – ka la long ka ba iaid beit ha ryngkat ka jingkyrshan na baroh kiba ai jingkren bad ruh na ki paidbah ka thain kiba la wan poi sha kane ka jingialang pynsngew paidbah.
Ha ka 23 tarik mynta ka sngi la pynlong ia ka kum kane ka juh ka jingialang ha Umlakhi – Wahsarang ka don hajan ka shong Iapmala.
Ia kane la pynlong na ka bynta ka ‘Nehlang Lyngdoh Coal Block’. Ka jingpynsngew paidbah ka la ioh ia ka jingmynjur na baroh ki nongkren, ki sengbhalang, ki rangbah shnong, ki Dolloi khlem kano kano ka jingpyrshah.
Kum ban pynkynmaw ba kane ka jingiohlad biang ban tih dewiong ha ka jylla ka la long 10 snem hadien ka jingkhang khyrdep ka National Green Tribunal (NGT) naduh u snem 2014.
Baroh ki nongkren, 12 ngut ha pdeng u hajar u paidbah ki la iaroh ia kine ki ar ngut, u ma Thomas Nongtdu bad ia u ma Nehlang Lyngdoh, uba dei ruh u MLA barim ka thain ba ki la long ki nongprat lynti ia kiwei pat ki trai par dewiong ha Jaintia ban ioh ia ka jingbit ban pyntrei dewiong katkum ka juk ba thymmai- Scientific Mining
Ia kane ka Public Hearing la pyniaid da ka Meghalaya State Pollution Control Board hapohn ka kynhun jong u Member Secretary ka MSPBC, Dr. GH Chyrmang, MFS,kiba kynthup ia u Environmental Engineers, YF Laloo, uba pyniaid ia ka jingialang bad u J.F. Lamurong nalor kiwei pat.
La donlang ruh u ma Justine Dkhar, MLA barim ka Khliehriat bad u ma Shitlang Pale MLA barim ka Sutnga Saipung nalor kiwei pat ki rangbah shnong bad ki Dolloi.
U Deputy Commissioner u Shivanand Awasthi long uba kongsan eh ban sakhi ia kane ka jingialang uba la ai ruh ka jingkren kaba khadduh ban pynbna ba kane ka jingialang ka la kutnoh.
