Ka Shnong Larnai ha West Jaintia Hills ka dei ka Shnong kaba paw bha ban shna ia ki Kiew Ranei lane Khiew Khyndew ha kiba bun ki dur kynthup ia ki Khiew, ki pela bad kiwei kiwei.
Ha kane ka 7 Tarik November, 2024, ka kynhun ki Nongthoh khubor na Jowai bad na Shillong hapoh ka jingialam ki sahep na ka tnad Meghalaya Information and Public Relation ba la lam khmat da u Director, u Malthus Sangma bad Assistant Director u ma Rimaya Muksor ki la hiar sha Shnong Larnai ban sakhi ia kane ka rukom shna ia ki Khiew Khyndew katkum ka juk hyndai.
Ki ba trei ia kane ka kam shna Khiew Khyndew ha katei ka shnong ki dei tang ki kynthei suda ha kaba ki la seng ruh ia ka Society kaba la tip kum ka “Seng Kynthei Pyrtuh Pottery Organisation”, naduh u send 1983 bad ka la ioh ruh ia ka Pottery Shed kaba la iarap Pisa lyngba ka MP Scheme u ma Vincent H Pala.
Ia kine ki Khiew Khyndew la die ia ki sha kiwei hapoh District bad ha Shillong bad shaduh Assam.
U Khiew shet ‘Pu Tharo u dei uwei na ki jait Khiew ba iaid iew bha ha ri lum Khasi bad Jaintia.
Haba batai kumno la shna bad nangno la ioh ia ka Khyndew na ka bynta ban shna ia kine ki Khiew kawei na ki longkmie ka la iathuh ba ia kine ki khliew la sdang ban shna naduh ka por hyndai da ki longshwa man shwa bad kaba la neh pateng haduh kine ki sngi.
Ban shna ia kine ki Khiew donkam ia ka Khyndew kaba la tip kum ka ‘Dew Pnah’ lane ka ‘Dew iong’. Ia kane ka jait khyndew lah ban ioh tang na Pynthor Sung Valley da kaba tih haduh 15 phut eiei shapoh.
La iathuh ka shimpor ban pynrkhiang bad ban thang ia kine ki Khiew khnang ba kin long kiba eh bad kiba neh slem haba pyndonkam ia ki.
Ha kane ka sngi, ka kynhun ba san ngut eiei kiba na Kerela ki la wan sah ha katei ka shnong na ka bynta ban pyndep ia ka project kaba iadei bad ka jingpule Jong ki. Ki la wan sah mynta la ar taiew bad kin dang sah sa shi taiew ha shwa ba kin leit phai sha la shnong.
Ki Dkhot Ka Seng Kynthei Pyrtuh Pottery Organisation ki la ioh lad ruh ban ia shim bynta ha ki Exhibition bapher bapher lyngba ka jingbeinpisa ka sorkar jylla na ka bynta ban pyni rong bad ban die ia kine ki Khiew Khyndew.
