KHLIEHRIAT :
Ki jingkieng kiba don ha shi lynter u surok bah National Highway NH 06 ha ka thain Nadpuh, East Jaintia Hills ki don hapdeng ka jingma kaba khraw namar ka jingsniew bad ki lah ruh ban julor noh kano kano ka por.
Kine ki jingkieng ki don ha ki shnong ba kynthup ia ka Tongseng, Sunapyrdi, Pyrtakuna, Umkiang bad ka shnong Rattacherra.
Ban iada ia ki paidbah bad ia ki Driver/Kali kiba iaid lyngba utei u surok bad ban lait na kino kino ki jingjia ba sngewsih na ka liang u Deputy Commissioner, East Jaintia Hills u la bthat bad hukum ia u Project Director, National Highway Authority of India (NHA), Meghalaya, Shillong ban shimkhia mar mar ban moramot ia kitei ki jingkieng ha katei ka thain.
Na ka liang u DC u la kyntu ia baroh ki kali, ki paidbah ban husiar haba iaid lyngba kine ki jingkieng bad ban bud ryntih ruh ia ki Traffic Rule ban lait na kino kino ki jingjia ba sngewsih tad haduh ka jingtrei moramot kan dep.
