KHLIEHRIAT:
Ka public hearing ka Star Cement Meghalaya Limited na ka bynta ban pynheh ia ka par tih mawshun ha Bri Shyrnot, East Jainria Hills kaba pynglong da ka Meghalaya State Polution Control Board ha ka 8 tarik une u bnai ka la long kaba iaid beit iaid ryntih khlem kino kino ki jingthut.
Napdeng ki 30 ngut ki nongkren ha katei ka jingialang pynsngew paidbah ki don tang 4 ngut kiba pyrshah kynthup ia ka seng KSU Narpuh ba la kren da u President ka seng u bah Kwilness Suchiang.
Ki nong shong shnong Bri Shyrnot ruh ka la ai ka jingkyrshan ba pura ia ka Star Cement ban pynheh ia katei ka par jong ka sa 65 hectare.
Haba ia kren bad u rangbah shnong u bah Standly Massar, u la ong ba ka jingdon kane ka par tih mawshun kan wanrah bun ki jingmyntoi ia ki paidbah nongshong shnong naduh ka iohkam iohjam bad ki kam pynroi hapoh shnong. U lathuh ruh ba ka Star Cement ka la ai kam ia jam ia ki katto katne ki samla ka shnong bad ruh ka la thung ar ngut ki nonghikai ha ka skul ka shnong nalor ki nonghikai SSA. Ka la pynioh kot ruh ia baroh ki khynnah skul hapoh shnong.
Na ka liang ka KSU Narpuh Circle pat ka la pynpaw ka jingpyrshah halor ka jingthmu jong ka Star cement ban ioh tih ia u mawshun ha Bri Shyrnot.
Ka seng ka pyrshah halor ka nongrim ba kane khlempep kan ktah shuh shuh ia ka Wah Lunar bad Wah Lukha, namar ki jaboh baroh ba mih na kane ka par kin tuid sha kitei ki wah.
Kumba long mynta hi kitei ki wah ym don ba nud ban dih namar ba ki la jakhlia. Ka seng ka ioh ban pynsngew ia ka jingpyrshah lyngba ki jingai jingkren ha rynsan jingpynsgew paidbah lane public hearing ba la long mynta ka sngi.
“Ka jingma kaba ap ia ka pateng ban wan. Ka jingduh noh ki lum ki wah, ka jingkiew ka jingshit kyrang, ka tdem ba mih ryngkat u pum pum, ka jingbymiohsngew shuh ia ka jingpah sngewthiang ki sim ki doh. Ka seng ka pynpaw ka jingsngewdiaw shisha ba lano ki paidbah kin sngewthuh bad kyndit bynriew”, la ong u Kwilnes Suchiang ka KSU Narpuh Circle.
Na ka liang u Asistant General Manager (AGM) ka Administration Department ka Star Cement u la ong ba ka bor shnong bad ki shnong ba marjan ruh ki la ai ka jingkyrshan ia kane ka jingthmu ban pynheh ia ka par tih mawshun bad ha ka juh ka por u la ong kito ki bym lah ban iadonlang ruh ki la ainka jingkyrshan da kaba ai da ki jingthoh sha Pollution Board bad sha u Deputy Commissioner ka East Jaintia Hills.
